Item JM-AIY/OttomanRegisters/Vol9/p19a/item126 - Upon a petition for the preparation of the welcoming ceremony for the German Emperor in Jerusalem, 31 July 1900 (Gregorian calendar) - 18 Tammûz 1316 (Ottoman fiscal calendar (Rumi)

1 item

Alman İmparatoru Kudüs’e huzurlarında tertibât müteahhidi Corci Cohriye (?) Effendi’den fi 6 Temmuz sene 1316 tarihli verilen arzuhal üzerine
Müteahhid-i mumâ-ileyh ile vaktiyle ta’âti edilmiş olan mukâvelenâmede Almanya İmparatoru hazretlerinin Kudüs’e huzûrlarında belediye tarafından i’tâ kılınan fanusların mahalât-ı muâyene ve ma’lumede ta’likiyle yedi gece ikâdı ve bazı mahallerin sancak ve saire ile tezyini ve buna mukabil geçer akçe hesâbıyla kendisine sekiz bin guruş i’tâsı ve istilâm edeceği eşyadan yüzde beşten ziyâde zâiyât olur ise kendisine tazmin edileceği meşrût olup İmparator müşârün-ileyh buradan âzimetinde sahib-i istidâya teslim kılınan eşyanın istirdâdında (geri isteme) yüzde beşden ziyâde 1803 guruş kıymetle fanus ve saire noksan olduğu tebeyyün etmiş ve kendisinden talep olundukta noksan olan mezkûrü’l-mikdar fanus ve saire mahalât-ı muâyyene hilâfında ba-sened ve bilâ-sened olarak bazı zevata ve me’mûrin ile mahalât-ı emiriye ve askeriyeye i’tâ olunub nezdlerinde baki kaldığı cevaben beyân ve iki kıt’a pusulada zevâtın ve me’mûrin ve mahalâttan taleb olundukta bunların ekserisi eşyây-ı mezkûrenin ahzını i’tirâf etmişler ise de vaktiyle şekt ve mühterik olduğu cevabında bulundukları ve bazıları me’mûrinlerin tahvili hasebiyle Kudüs’den azimet ve isfikâk (yerinden ayrılma) eyledikleri cihetle eşyây-ı mezkûrenin istirdâdı müteazzir (zor) bulunmuş ve merbûten takdim kılınan pusulada beyân olunduğu vechile 1853 guruş kıymetli eşyadan ba-sened teslim olunanlardan Beytüllahem’den kırk dört sancak ile elli direk ve on fanus red ve iâde olunarak hıfz edilmiş ve bilâ-sened verildiği müteahhid tarafından beyân olunan fanuslar ve saireden alındığı iddia olunanalar kıymeti 296 guruş yirmi paradan ibâret bulunmuş olduğundan ve bunun müteahhide tazmini müktezi olduğu mütalaa olunarak keyfiyet fi 22 Eylül sene 1315 tarihli meclis-i acizânemizden yazılan derkenarda arz olunmuş ise de müteahhid-i mumâ-ileyh bazı zevât ve me’mûrine ve devair-i emiriyeye ve askeriyeye fanus ve saire teslim etmesi lüzûmuna dair bir emr ve karar bulunmamasına nazaran gerek ba-sened ve gerek bila-sened müteahhid tarafından me’mûrin-i mumâ-ilehime ve mahalât-ı mezkûreye i’tâ ve teslim olunan eşyanın daire-i belediye ma’rifetiyle istirdâd edilmesine mecbûriyet olduğu cihetle ber-mûcib-i mukâvele Beeytüllahem’dem iade olunan sancak ve direk ve fanusların esmânı ba’de’t-tenzîl yüzde beşten ziyade olan zâyiât esmânının müteahhide tazmini lüzûmunun fi 26 teşrin-i evvel sene 1315 tarihli meclis-i idare-i livâdan ba-takrir beyân olunmuş ve beytüllahem’den istirdâd olunan eşyanın pahası 497 guruş 10 paradan ibâret olup yüzde beşten ziyâde olan zâyiâtın esmânından led-et-tenzîl 1355 guruş 30 para baki kalmış ve ber-vech-i ma’rûz be-sened ve bilâ-sened müteahhid-i mumâ-ileyh tarafından mukavelenâmede muayyen olan mahalât hilâfında bazı zevât ve me’mûrin ile devâir-i emiriye ve askeriyeye teslim olduğu beyân olunan fanus ve sairenin mikdarıyla esmânını mutazammın iki kıt’a pusula leffen takdim kılınmış olmağla bunların bir kere daha zabıta ma’rifetiyle esâmisi muharrer zevât ve me’mûrşn ve mahalâttan istenilerek istirdâd olunmadığı halde müteahhid-i mumâ-ileyh ile isterse icâb edenler aleyhine ikâme-i deâvi edebileceği tabi’ bulunmuş olmağla ol babda emr ü ferman. Fi 18 Temmuz sene 316.

• Osmanlı Türkçesi