Item JM-AIY/OttomanRegisters/Vol13/p11b/item67 - Marginal note regarding lighting, cleaning and watchman services, 8 September 1908 (Gregorian date) - 26 Agustos 1324 (Ottoman fiscal calendar (Rumi)

Tenvir ve tanzîf ve hırâset hakkında ba’zı ahâli tarafından fî 22 Ağustos sene 1324 tarihli takdim kılınan istidasına derkenârdır
Şehirlerin gece hırâsetinin masârifi mecâlis-i belediyeye aid olduğuna dair ne mezkûr Mecâlis-i Belediye Nizamnâmesi’nde ve ne de masârif-i tanzîfiye karşılığına vaz’ olunacak mürettebât hakkında fî 14 Receb sene 1306 ve fî 4 Mart sene 1305 tarihli mevzû’ kararnâmede mezkûr olmadığından ve belediye tarafından dekâkîn ve hânelerden tahsil olunmakta olan mürettebât tanzîf ve tenvir masarifâtına bile kifâyet etmemekte olduğu ve iş bu istidâda beyân olunduğu vechile iki sene evvel mezkûr hırâset masârifinin bir kısmı belediye ma’rifetiyle bi-t-tahsîl bekçilere sarf olunmakta bulunmuş ise de tahsil kılınan mebâliğ umûm bekçilerin maaşâtına gayr-i kâfi bulunmasından dolayı maâşât-ı mezkûrenin üst tarafı belediyye sandığından sarf olunub bunun idâmesi belediye umûr ve icraatının âdem-i temşiyeti (yürütme) mûcib olacağı tebeyyün etmiş ve geçende vâki’ olan taleb üzerine Dâhiliye Nezâret-i celîlesinden takdim kılınmış olan sancak devâir-i belediye büdçeleri tedkîk olunarak mezkûr büdçelerde belediyeye aid olmayan masârifin tenzili müktezî olduğu Şurây-ı Devlet Maliyye Dairesi’nin bâ-buyruldu-ı sâmî tebliğ olunan mazbatası sûretinde gösterildiği Dâhiliyye Nezâret-i celîlesinin fî 27 Mart sene 1321 tarihli ve 9 numerolu tahrirât-ı âlisinde beyân buyrulmuş olmasına binâen merkûm bekçiler maâşâtının üst tarafının belediyye sandığından sarf ve teşviyesi tebligât vâkı’aya muhâlif olacağından başka belediye vâridâtının âdem-i müsaidesinden dolayı bu babda meclis-i âcizânemizden bir tezkere takdîm olunarak merkûm bekçilerin istihdâmı taht-ı lüzûmda ise sa’ir mahâllerde olduğu gibi maaşâtı Polis Dairesi tarafından iktizâ edenlere bi-t-tevzi’ tahsili müktezî olduğu meclis-i idâre-i livânın fî 14 Mart sene 1322 tarih ve 82 numerolu kararında beyân buyrulmuştur ol vakitden beri merkûm bekçiler maaşâtı Polis Dairesi ma’rifetiyle tahsil ve tevzi’ olunmakta olmağla ve iş bu istidâ mündericâtının tervîci belediye vezâifinden hâric bulunmağla icrây-ı icâbı bâbında emr ü fermân. Fi 26 Ağustos sene 324.