Item JM-AIY/OttomanRegisters/Vol14/p12a/item53 - Upon a Ministry of Internal Affairs telegram regarding the specification of somes articles, 10 February 1909 (Gregorian calendar) - 28 Kânûn Thânî 1324 (Ottoman fiscal calendar (Rumi)

1 item

Belediye kanûnunun ba’zı mevâddının ta’dîline lüzûm gösterilmekte olduğundan kanûn-ı mezkûr ahkâmından ta’dîline lüzûm görülen mevâdd var ise beyânı hakkında Dâhiliye Nezâret-i celîlesinin fi 20 Kanûn-ı sânî sene 1324 tarihli telgrafnâmesi üzerine
İş bu telgrafnâme meclis-i acizânemizce mütâlaa kılındı husûs-ı mezkûr hakkında led-et-tezekkür Mecâlis-i Belediye Nizâmnâmesi’ne zîrde muharrer ta’dîlâtın icrâsı mütâlaa olunmuştur
Evvelen mecâlis-i belediyenin 3. maddesinde masârifi âid olduğu taraftan tesviye olunmak üzere umûmi ve husûsi suyollarının inşâ ve ta’mîri mezkûr ise de mezkûr yolların masârifi intifâ’ (menfaatlenme) edecek erbâb-ı emlâkden lüzûm-ı tahsîl ve tesviyesine tasrîhi ve nân-ı azîzin fi’yâtından başka havâyic-i zarûriyeden olan diğer me’kulât-ı sâire ve mahrûkât için belediyeler tarafından narh vaz’ına me’zûniyyet i’tâsı
Sâniyen 39. maddede musarrah vâridâtdan başka Dâhiliye Nezâret-i celîlesinin fi 9 Teşrîn-i evvel sene 1324 tarihi ve 147 numerolu mevrûd tahrirât-ı âliyesi üzerine meclis-i acizânemizce belediyeye âid tutulması mütâlaa kılınıb berây-ı tezekkür evrâkı meclis-i idâre-i livâya havâle buyrulan evrâk hakkında bâ-tezekkür nezâret-i müşârün-ileyhâya cevâb i’tâsıyla andan tertîb ve tahsîsi tensîb kılınacak vâridâtın madde-i mezkûreye tafsîlen derc ve ilâvesi
Sâlisen 65. maddede muharrer olduğu vechile belediye çavuş ve müfettişleri vazifeleri dâhilinde bulunan mevâddın taharri ve tahkîki zımmında hamam ve mağaza ve tiyatro ve bu misüllü mahallere duhûl ve ifâ-yı vazifeye me’zûn olduğu gösterilmekte ise de madde-i mezkûre ahkâmı yalnız teba’-yı Osmaniyye hakkında icrâ olunmakta olduğundan teba’-yı ecnebiyeye âid mahalâta da teşmîli esbâbının istikmâli
Râbian teba’-yı ecnebiye tarafından tenbihât-ı belediyeye muhâlefet edenler hakkında mecâlis-i belediyyeden tertîb kılınacak cezâ-yı nakdîlerin tahsîliyle emr-i vaz’ında konsoloslar tarafından muhâlefet gösterilmemesi esbâbının istikmâli
Hâmisen mecâlis-i belediye tarafından ber-mûcib-i nizâm tahsîs kılınacak umûm vâridâtın i’tâsına düvel-i ecnebiyye teba’sı mecbûr tutulması esbâbının istikmâli
Sâdisen devâir-i belediye diğer devâir-i resmiyye gibi add ile tarafından irsâl kılınacak mekâtib ve telgrafnâmeler kabûl ve keşîdesi için lâzım gelenlere me’zûniyyet i’tâsı
Sâbian sâir mahalât-ı hayriyenin vergiden müstesnâ olduğu gibi belediyeye âid emâkin vâridâtı menâfi-i beldeye mahsûs bulunmasıyla belediye emâkininin dahi vergiden istisnâsı
Sâminen belediyye ketebe ve diğer me’mûrîn-i dâimesinin maâşâtından tekaüdiye kat’iyle sâir me’mûrîn-i devlet gibi tekaüd maâşâtından müstefîd tutulmaları
Husûsât-ı mezkûre hakkında bi-t-tezekkür münâsib ise icrâ-yı icâbı bâbında emr ü fermân fi 28 Kanûn-i sânî sene 324.

• Osmanlı Türkçesi