Item JM-AIY/OttomanRegisters/Vol6/p31b/item206 - Street repair before the visit of the German Emperor, 15 September 1898 (Gregorian calendar) - 3 Aylûl 1314 (Ottoman fiscal calendar (Rumi)

1 item

Vâreste-i arz ve beyân olduğu üzre seyâhat-i ma‘lûmeye mebnî dâhil ve hâric-i şehirde kâin tarîklerin ta‘mîr ve ıslâhı iktizâ edip tahmîn kılınan masârifâta göre turuk-ı mezkûreye büdcede tahsîs kılınan 41.500 guruşdan başka 80 bin guruş istikrâzı muktezî olduğu tebeyyün etmesi üzerine meblağ-ı mezkûrun istikrâzına dâir istîzân edilerek Fi 13 Haziran sene 314 tarihli meclis-i idâre-i livâdan bâ i‘lâm tasdîk kılınmış ve bi'l-âhare turuk-ı mezkûre ameliyâtına muktezî kum yerine hûr (?) ile iktifâ olunmasından nâşî mezkûr 80 bin guruşa ihtiyâc kalmayup yalnız 500 aded Fransa lirası muktezî olduğu tebeyyün etmiş ve şeref-sünûh buyurulan irâde-i seniyye-i hazret-i pâdişâhî üzerine kal‘a hendeğinden müceddeden şose temdîdine mübâşeret kılınmış olmasıyla iki yüz liradan beş yüz liraya kadar istikrâzına lüzûm bulunmuş olduğundan Filistin Almanya Bankası Müdîri ile lede'l-mükâleme iktizâ eden sâlifü'z-zikr bin aded Fransa lirası yüzde dokuz hesâbıyla hesâb-ı cârî üzerine ya‘ni bir şey tesdîdi hâlinde fâ’izi tenzîl olunmak üzre iki sene müddet için i‘tâsına rûy-ı rızâ göstermiş ve bâlâda arz olunduğu vechile yollara muktezî ânifü'l-beyân bin aded Fransa lirası tesdîdi için tarîr müte‘ahhidi Hovace Tebridi zimmetinde kalup sekiz mâhdan sonra sandığa te’diyesi müstahak olacak 200 aded lira ile 315 senesi belediye vâridât-ı sâiresinden 300 ve 316 senesi vâridâtından 500 lira tahsîsi ve İmparator Hazretleri azîmetinden sonra hendek üzerine inşâsına teşebbüs kılınan mebânînin inşâsi için 8 bin liradan 10 bin liraya kadar muktezî olacak mebâliğin bank-ı mezkûrdan yüzde altı hesâbıyla eshâm sûretiyle i‘tâsına mükâleme olunarak vaktiyle muvâfakat olunduğu hâlde mezkûr bin liranın güzeştesi târîh-i mukâveleden i‘tibâren yüzde altı hesâbıyla icrâ-yı mahsûbu müdîr-i mûmâ-ileyh ile takarrür etdiğinden mezkûr bin liranın sûret-i mesrûde üzerine bank-ı mezkûrdan ceste ceste hesâb-ı cârî üzerine bâ tezekkür tensîb buyurulduğu takdîrde tasdîki zımnında meclis-i idâre-i livâya emr ü havâlesi bâbında. Fi 3 Eylül sene 314 (15th of September 1898).

• Osmanlı Türkçesi