Item JM-AIY/OttomanRegisters/Vol7/p6a/item33 - About tax fees on the road leading from Jerusalem to Jaffa and his care, 26 November 1897 (Gregorian date) - 14 Tishrîn Thânî 1313 (Ottoman fiscal calendar (Rumi)

1 item

Kudüs-i şerif’ten Jaffa’ya mümtedd şosede mürûr eden arabalardan otuzar guruş alınmayıp kişiye mahsûs yüklü arabaların hayvanlarından ve arabadan altı guruş ve yüksüz olduğu halde hayvanlarından altmışar para ve arabadan üç guruş resm alınmakta olduğu ve varidât-ı mezkûrenin Belediye Hastahanesi masârifât-ı daimesine karşılık icâdı için sebk eden istizân üzerine icrâ-yı icâbı fi 29 Şevval sene 1305 ve fi 27 Haziran sene 1305 tarih ve 20 numerosuyla Dâhiliye Nezâret-i Celîlesi’nden şeref-vurûd eden emirnâmede irâde buyrulmuştur mezkûr şosenin mebde’i (başlangıç) haric-i şehirde ikinci ka’leden bi’l-itibar emr-i ta’miri Nafıa’ya ve tetimmesi (bitiş) olan Bab-el-Halil’den Şimendifer mevkifine ve haric-i sûrda Birket-i Hicce nam mevki’e mümted kısmının idare ve enr-i ta’miri meclis-i acizânemize terki fi 4 Zilkâde sene 1309 ve fi 18 Mayıs sene 1308 tarih ve 92 numerosuyla murakkaman Ticaret ve Nafıa Nezaret-i celilesinden şeref-vurûd eden emirnâmede irâde buyrulmuş olmasıyla emr-i ta’miri belediyeye aid iş bu yollar ile diğer yolların mesâfesi 11 kilometreden ibâret olup üzerinden gece gündüz arabaların kesretle mürûr ve ubûrundan dolayı mütemadiyen emr-i ta’mirine bakılmaz ise mürûr münkat’ olacağından enzâr-ı yâr u agyâra karşı böyle bir hale tesâdüf edilmemek ve senevî ta’mirâta müktezi olan 65.000 guruşa karşılık olmak üzre Kudüs şehrine mahsûs arabalardan yevmî beşer ve Beytüllahm arabaları Kudüs şevâri’inde işleyecek olursa onlardan kezlik üçer guruş alınması fi 11 Haziran sene 1306 tarihli meclis-i idare-i livâ kararıyla tensîb kılınmıştı rüsûm-ı mezkûreden başka diğer ve daha ziyâde bir şey alınmamakta olduğu ve mezkûr Beytüllahm arabaları yalnız istasyondan şehir kapısı olan Bab el-Halil’e kadar işlemeyip salif-ül-beyân Kudüs şevâri’indeki 11 kilometroda dahi işlemekte bulunduğu cihetle şikâyet-i vakıâyı esâsdır bu yolların kemânigi (gereği gibi) ta’miri lâzım gelse senevî yüz binden ziyâde mebâliğe ihtiyâc görüneceği ve Kudüs şevâri’inde işleyen Kudüs ve Beytüllahm arabaları elli adet araba mikdarında olup ber-vech-i ma’rûz resm alınmak üzere bu sene 60.000 guruş bedel ile iltizâma verildiği ve rusûm-ı mezkûre ref’i veyahud ta’dil edilecek olur ise matmah-ı (tamâh olunan, hırsla göz dikilerek bakılan yer) enzâr-ı yar u agyâr olan Kudüs kasabasının şevâri’i harabiyette kalacağından bunun mesûliyetinden meclis-i acizânemiz müberra olacağının arzıyla ve defter-i metlûb bi-t-tanzîm merbut-ı takdimle keyfiyetin bir kere de meclis-i idare-i livâca ba’d-et-tezekkür icâbı vechile iş bu nâmeye cevâb i’tâsı merbût-ı müsâde-i âliye-i mutasarrifidir ol babda. Fi 14 Teşrîn-i sâni sene 313.

• Osmanlı Türkçesi