Item JM-AIY/OttomanRegisters/Vol3/p39b/item278 - About road taxes, 22 May 1899 (Gregorian calendar) - 11 Mayîs 1315 (Ottoman fiscal calendar (Rumi)

1 item

Mültezim-i mezkûr bi’l-celb kendisinden istifsâr-ı madde edildikte târik-i mezkûrda Yazur Kal’esi ve Neter-mahal arasında min-el-kadim mevcûd olan kulube ile Jaffa’daki merkezden başka diğer bir kulube mevcûd olmadığı ve kaçanların men’î zımmında Tel-Ariş’de bir kolcu mevcûd olduğu ve mezkûr noktalarda kulube ve bekçi vücûd-ı esbâbı ise şoseden mürûr eden yolcuların resm itâ etmemesi için mevkî-i mezkûrdan firar ve bağçeler arasındaki mü’teaddid yollardan Jaffa’ya dühûl eylediklerinden ileri geldiği ve Jaffa kazası civarında ve bağçeler arasında şose yoluna duhûl olan yolculardan rüsûm-ı mürûriyye istifâsı aslen kıyâm ve teşebbüs eylenmediği cevâben beyân ve ityân eylenmiş ve işbu seneye mahsûben mültezim-i merkûm yeddinde itâ kılınan şartnâme mündericâtı sinîn-i sâbıka şartnâmesinin tıbkısı olub Lud ve Ramla ve Gaza ve Jaffa kazası köylerinden gelib şoseden mürûr eden yolculardan rüsûm-ı mürûriyyenin sülüsünü alınması muvazzah olduğu ve herhangi cihetden gelirse gelsin şose yoluna uğrayacakların rüsûm-u mürûriyeyi ifâya mecbûr tutulmalarını tazammun eder yeni bir kayd muharrer olmadığı ind-el-mütalaa tebeyyün edeceğinden ve Kudüs’e civar köylerin yolcusu Kudüs surundan yalnız yirmi dakika ba’id Şehbender nam mevkîden şose ile ihtilât eyledikleri cihetle resmden muaf tutuldukları mustagni-i arz ve beyân olunduğu üzere rüsûm-ı mezkûre şimdiye kadar alınması şoseye irâs edilecek tahribâtın ta’mir ve tazminine karşılık olub Kudüs’te tebâ-yı Osmaniyeye ve züvvâr-ı İslâmiyeye mahsûs olarak bir hastahâne mevcûd bulunmamasından dolayı mezkûr şose vâridâtı karşılık tutularak bir hastahâne inşâsı ve güşâdı led-el-istizân icâbının icrâsı ba-tezkere-i sâmiye-i sadâret-penâhide emr ve irâde buyrulduğu fi 29 Şevval sene 305 ve fi 28 Haziran sene 304 ve 20 numerosuyla murakkaman Dâhiliye Nezâret-i Celîlesinden şeref-vurûd eden emirnâme-i âlîde irâde buyrulmuş ve hastahâne-i mezkûre Kudüs kazası ahâlisine münhasır olmayub umûm sancaktan ve hâricden gelen tebâ-yı Osmâniyye ve züvvâr-ı İslâmiyyeye mahsûs olduğu cihetle idâresine müktezî vâridâtın terakkisi mültezem bulunmuş ve rüsûm-ı mezkûre kemâ-sâbık emr-i cibâyetinde Jaffa hükümeti tarafından müsaade olunmamasından dolayı mültezim tarafından sûreti matviyyen takdîm kılınan ihtarnâme mukavelat muharrirliği vasıtasıyla meclis-i âcizânemize tebliğ kılınmış olmağla rüsûm-ı mezkûre kemâ-sâbık istifâsı muktezî olduğunun cevâben beyân ve iş’ârı. Fi 11 Mayıs sene 315.

• Osmanlı Türkçesi