İttisâi dört arşûn olan ve Jaffa şosesinde hazret-i akâşe radiyallahü anh caddesine müdî’ bulunan yolun darlığından dolayı mürûr u ubûr edenlere mûcib-i meşakkât ve su’ûbet olmakta olub bu babda müttehiz olan ebniye nizamnâmesinin birinci maddesine tevfiken sekiz arşûna iblağı muktezî bulunmuş olduğundan ve tevsî-i tarik için ahz olunacak yerlerin târikin iki tarafındaki yerlerden nısfıyyet üzere alınması ve müceddeden guşâdı veya mevcûdunun tevsi’i iktizâ eden yolların mikdâr-ı ittisâi meclis-i belediyeden ta’yin olunub icâbı meclis-i idârede icrâ olunması nizâm-ı mezbûrun üçüncü ve sekizinci maddelerinin ahkâmından olmasıyla mezbûr yolun bir tarafı Set Şarlota ile Hovace David Kokya’nın ve diğer tarafı Mösyö Hayim Valirv’in arâzisinden olub Set Şarlota arâzisinden müceddeden ebniye inşâ edileceği cihetle mezkûr yola iki arşûn terk olunması meclis-i âcizânemizden verilen ebniye ruhsatında şart edilmiş olduğundan merkûmân David ve Valirv arâzisinden ikişer arşûn terk ettirilmesi için icâb eden bir kıt’a harita bi-t-tanzîm matviyyen takdim kılınmış olmağla icrâ-yı icâbı zımmında meclis-i idâre-i livâya havâle buyrulması bâbında. Fi 13 Nisan sene 308.
Beyân-ı tevzi’: Kudüs Belediyesi Varidâtından Jaffa Belediyesi Varidâtından Gaza Belediyesi Varidâtından Ramallah Belediyesi Varidâtından Halil Belediyesi Varidâtından
Balâda muharrer belediye tabibinin ikinci derkenârında beyân olunduğu vechile umûm Kudüs Sancağı ahâlisi etfâlini aşılamaları için otuz sekiz bin beş yüz guruş masârifata ihtiyâc bulunduğu led-el-hesâb tebeyyün etmiş ve meblâğ-ı mezbûr her kaza belediyesi varidâtına nisbeten tevzî olundukta kazaların her birine isâbet eden hisse bâlâda yazılmış ve varidât-ı belediyyeyi cüz’üi olan kâzâ etfâlinin telkihi için icâb eden masârifâtın varidât-ı mütehammil olan diğer kâzâ belediyesi vâridâtından tesviyesi işbu emirnâmenin ahkâmından bulunmuş olduğundan ve Ramla ile Halil-ür-rahman belediyeleri vâridâtı onlara merbût köylerin ahâlisi telkihine kâfi bulunmadığına mebnî iktizâ eden aşı kaleminin mübayaasıyla aşıcılar buradan gönderilmek üzere umûm belediyelere tahsîs kılınan meblağın re’y-i livâya irsâli muktezî olduğu mütalaa olunmuş ise de berây-ı tezekkür keyfiyetin meclis-i idâre-i livâya havâle buyrulması bâbında. Fi 13 Nisan sene 308.
İttisâi dört arşûn ve Jaffa şosesinden Rusyalılar misâfirhânesine mû’di bulunan yolun darlığından dolayı mürûr u ubûr mûcib-i su’ûbet olmakta olub bu babda müttehiz olan ebniye nizamnâmesinin birinci maddesine tevfiken sekiz arşûna iblağı muktezî bulunmuş olduğunda tevsî-i turuk için ahz olunacak yerlerin tarikin iki tarafındaki yerlerden nısfiyyet üzere alınması ve müceddeden guşâdı veya mevcûdunun tevsî’i iktizâ eden yolların mikdâr-ı ittisâ’i meclis-i belediyyeden ta’yin olunub icâbı meclis-i idârede icrâ olunması nizâm-ı mezbûrun üçüncü ve sekizinci maddeleri ahkâmından olmasıyla tarik-i mezkûr ile iki tarafındaki mahalâtın haritası tanzîm edilerek bugün takdîm kılınmış olduğundan mûcibince iktizâ eden yerlerin ahzıyla yola terk ettirilmesi zımmında meclis-i idâre-i livâya havâle buyrulması bâbında. Fi 14 Nisan sene 308.
Mülhak kazalardan Ramla’den üç yüz beş ve altı ve yedi ve Jaffa ve Gaza’den üç yüz altı ve yedi senelerinin muhâsebesi sûret-i irsâli hakkında fi 12 Şubat sene 1307 tarih ve yüz doksan yedi numerolu meclis-i âcizâmizden takdîm kılınan takrîr üzerine mezkûr kazalara bâ-evâmirnâme-i âlîyyeleri irâde ve iş’âr buyrulmuş ise de şimdiye kadar gönderilmediği ve müstagnî-i arz ve beyân olunduğu üzere belediyye meclisinin muhâsebesi beher sene nihâyet-ün-nihâye şehr-i nisanda tanzîm ve mercî’ine takdîmi muktezî bulunmuş olduğundan mezkûr muhâsebeler dört beş gün zarfında nizâmı da’iresinde bi-t-tanzîm cem’iyyet-i belediyeden musaddak oldukları halde buraya sûret-i irsâli ve te’hirine sebep olan me’mûrinin taht-ı mesûliyete alınacakları mezkûr Jaffa ve Gaza kaymakamlıklarına bâ-evâmirnâme-i âlîyyeleri irâde ve iş’arı bâbında. Fi 20 Nisan sene 308.
Mezkûr postaların maktû’ ücret ile müteahhidleri tarafından nakl olunmakta olduğu cihetle arabaları şose rüsûmundan hiçbir senede mu’af tutulmamış sair kur’â arabaları gibi iktizâ eden rüsûm i’tâ etmekte oldukları ve hâl-i hazırda âdem-i i’tâsı olmasının esbâbı ise Telgrâf ve Posta Müdüriyeti ile Avusturya ve Macaristan devleti konsolatosundan hâsıl olan tenbîhten münbais olduğu led-et-tahkik tebeyyün etmiş olduğundan rüsûm-ı mezbûrenin sâbıkı misüllü arabalar ashâbından i’tâsı muktezî olduğundan mezkûr Telgrâf ve Posta Müdürlüğü ile Avusturya konsolatosuna bâ-tezkere-i âlîyyeleri irâde ve iş’ârı bâbında. Fi 20 Nisan sene 308.
Mezkûr şosenin ta’mir ve ıslahı sağ akçe olarak altmış bin guruşa muhtâc olduğu vaktiyle husûl olan su’âl üzere bâlâda muharrer Nafıa Sermühendisliği tarafından verilen cevapta beyân olunmuş ise de Kudüs kazası haricindeki umûm yollara sarf olunmak üzere üç yüz sekiz senesi büdçesinde yalnız elli bin guruş tahsîs kılınmış olub mezkûr şosenin hâl-i hazırda belediye hastanesine su itmâm olunacak olur ise bu sene ebniyenin kesretinden dolayı su bahâsı pek fâhiş olduğu cihetle beyân kılınan mebaliğden daha ziyâde masârifâta ihtiyaç olduğu tebeyyün etmiş ve ta’miri derdest olan kısmının itmâm edilerek diğer kısmının sûret-i muvakkatada ıslâhı ile fasl-ı şitâda ta’miri icra olunduğu takdirde daha ehven masârife i’mâl olunacağından tezekkür buyrularak ol vechile imâl olunup olunmaması beyânı zımmında meclis-i idâre-i livâya havâlesi bâbında. Fi 20 Nisan sene 308.
Bâb üz-Zahire hâricinde ka’in Hüseyin Şetye (?) nam kimesine arazisi asâkir-i redif-i merkûme ikâmetine elverişli idüğü led-el-keşf tebeyyün etmiş ve sâhibi celb edilerek rûy-ı rızâ gösteriş keyfiyetin cevâben beyân ve iş’arı babında. Fi 21 Nisan sene 308.
Mezkûr elbise yedi takımdan ibâret olup beher takıma zira’i (arşın) geçer akçe hesâbıyla otuz altı guruş bâha ile dört arşın çuka müktezi ve mezkûr yedi takımdan dört takım ücret-i hayatiyesi seksen sekiz ve üç takım yüz kırk guruş olduğu ve mecmû’ bin yedi yüz seksen guruş masârifât müktezi olduğu led-el-mukâvele tebeyyün etmiş olmağla ol babda. Fi 23 Nisan sene 308.
Ma’aşât-ı me’mûrin ve hademe: 4000 (şehrî) x 12 (mah) = 48000 (Yekûn) Erzak pâhâsı: 3000 (Şehrî) x 12 (mah) = 36000 (Yekûn) İlacât pahâsı: 36000 (Yekûn) İlacât pahâsı: 36000 (Yekûn) 120000 (Yekûn) Bu senede hâric-i ez-büdçe inşâsı mutasavvir olan ba’zı mahallât mesârifi: 20000 Yekûn = 140000 Mezkûr belediyye hastahânesi mesârifatına yüz yirmi bin guruş muktezî olub fakat bu senede ba’zı mahallât inşâsı icâb-ı maslahatda bulunmuş olduğundan meblağ-ı mezbûrdan başka yine yirmi bin guruş sarfı müktezî bulunduğu bu hesâba göre Jaffa tariki ta’mirâtı için rüsûm-ı mezkûrenin nısfı kadar alınabileceği tebeyyün etmiş olmağla ol bâbda. Fi 22 Nisan 308.
Beytüllahm üç yüz sekiz senesi kantar ve keyyaliye rüsûmu müddet-i nizâmiyesi ta’lik edilerek kimesinenin rağbeti zuhûr etmemiş olmağla ol babda. Fi 22 Nisan 308.
