Rüsûm-ı mezkûrenin mevki’-i müzâyedeye tarh edilerek iktizâ eden teşvîkât ve tergîbât-ı müessire icrâ olunmuş ise de takarrür eden bedel üzere zamm edecek kimesinenin rağbeti zühûr etmemiş ve bunun esbâbı her senede züvvâr ile vurûdu mu’tâd olan hayvanattan geçen sene ile bu senede bir şey vurûd etmemesinden ileri geldiği led-el-tahkîk tebeyyün etmiş ve rüsûm-ı mezkûre iltizâma verilmeyip emaneten idaresi halinde vâridâtı zây’i olacağı tebeyyün eylediğinden tezekkür buyrularak ne vechile muamele olunması müktezi olduğunun beyânı zımmında meclis-i idare-i livâya havâle buyrulması babında. Fi 5 Mart sene 308.
Eriha’da zuhûr eden çekirgenin tekessür etmezden evvel mahv ve itlâfı zımmında iktizâ eden vesâile teşebbüs edilerek gaz ile itlâf olabileceği led-el-tücrübe tebeyyün etmiş ve şimdiye kadar meclis-i acizânemizden elli sandık kadar i’tâ olunmuş ise de küllî miktarda ihtiyâc olacağı cihetle kâffesi meclis-i acizânemizden i’tâsı mümkün olmayacağından ahalisi çekirge îtlâfına gitmeyen kurâ ahâlisinden birer mikdar gaz sandığı tevzî’i hususuna müsaade-i aliye-i velîy-ül-nî’metleri derkâr buyrulmak bâbında. Fi 7 Mart 308.
Mezkûr şosenin ta’mir ve ıslâhı altmış bin guruşa muhtâç olduğu bâlâda muharrer Nafıa Mühendisliği derkenârından anlaşılmış ve Kudüs kazası haricindeki umûm yollara sarf olunmak üzere 1308 senesi büdçesinden yalnız elli bin gurûş tahsîs ve tertîb kılınıp meblağ-ı mezbûrun tamamen mezkûr şosenin ta’mir ve ıslâhına sarfı veyahud bu senede nısfının ta’miriyle iktifâ olunması ve bakî kalacak meblağın diğer yolların ta’mirine sarf ve tesviye olunması tekessürü zımmında meclis-i idâre-i livâya havâle buyrulması babında. Fi 7 Mart sene 308.
Beytüllahim 1308 senesi rüsûmundan bedelâtı bulan bac-ı hayvan ile zebhiye rüsûmu ve selhhane bedeli icârı askıya konularak müzâyedeye kimsenin rağbeti zühûr etmemiş ve müddet-i nizâmiye mürûr etmiş olmağla ihâlesi zımmında meclis-i idare-i livâya havâle buyrulmak babında. Fi 28 Mart 308.
Fi 25 Şubat sene 306 tarihli meclis-i idare-i livâ kararı mûcibince kitâbet vazifesini müdüriyet tarafından ifâ edilmesi müktezi bulunmuş olduğundan karar-ı mezkûra tevfiken katib-i matlûb ta’yini mümkün olmadığının ihtarı babında. Fi 30 Mart sene 308.
İmâli taleb olunan tahta girdekin (küçük çadır) keşfi icrâ edilerek matviyyen takdim kılınan keşf mûcibince sağ akçe olarak sekiz yüz yirmi beş guruşa muhtâc olduğu tebeyyün etmiş olmağla ol babda. Fi 30 Mart sene 308.
Ramla yolunda vâki şosede ka’in büyük köprünün şiddetle hütûl eden baran sebebiyle hedm olduğu led’el-keşf tebeyyün etmiş ve ta’mir olunduğu halde mûrür ü ubûru münkatı’ olacağından keşfiyle iktizâ eden mesârifatın tahmin ve beyânı zımmında Nafıa sermühendisliğine havâle buyrulması babında. Fi 24 Mart sene 308.
Sahib-i istidânın mukaddemâ bu babda takdîm kılınan arzuhal üzerine iktizâ eden muamele icrâ edilerek takdîm kılınmış olmağla bunun dahi vergi dairesine havale buyrulması babında. Fi 25 Mart 308.
Mezkûr hastahânenin âcilen te’sisi ve güşâdı ile nefs-i Kudüs kazasında millet ve muhadderât-ı islâmiyye için diğer ta’ife olduğu gibi bir hastahânenin icâdı maksadına mebnî olub dâhil-i kazâda mevkî-i hastagâne münâsib bir mahal bulunmadığı cihetle mezkûr hastahâne mevkî-i hâzırda inşa edilmiş müstagnî-i arz ve izah olunduğu üzere sair hastahânelerde bulunduğu misüllü hastalığı hafif olanların tedâvisi için mezkûr hastahânede lüzûmuna göre haftada üç dört gün tahsisi müktezî olub ancak mezkûr hastahâne mevkînin bu’diyyeti hasebiyle muhadderât-ı islâmiyye ile âcizenin oraya kadar gittikleri emr-i refah ve istirâhatlerine bakılmamış olacağı tebeyyün etmesiyle işbu emir haberinin teshîl ve maksad-ı aslının cebr-i fiile husûlü zımmında mezkûr hastanenin teferruâtından olmak üzere derûn-u kazada bir eczane güşâd edilmiş ve bir seneden beri hâsıl olan tecrübe üzerine mezkûr hastahâneye nefs-i Kudüs ahalisinden pek az olarak ba’zı kesân gitdiği şimdiye kadar yazdırılan eşhâsın ekserisi mücâvir köyler ahalisi olub mezkûr eczahâne sedd ve iptâl edilerek olur ise mezkûr hastahâneden faide-i matlûbe hâsıl olamayacağı derkâr bulunmuş olacağından ve sâlif-ül-zikr kazada bulunan eczâhâne tabâbeti hastahâne tabibi ma’rifetiyle idâre ettirilmesi lâzımeden ise de ta’bib-i mumâ-ileyhin adem-i mikdârına nazaran bu vazife belediye tabibine gördürülmekte olduğundan ve hastahânenin emr-i idâre ve sairesi meclis-i âcizânemize aid mevâddan olub me’murlarının böyle umûra müdahalelerine mahal olmadıktan başka meclis-i âcizânemizden i’tâ kılınan tâlimâtın me’aline muhâlif olduğundan bâde-mâ vezâif-i asliyelerine îtinâ etmelerinin kendilerine ihtârı her halde mütevakkıf-ı irâde-i âliye-i mutasarrıf-ı azîmleri bulunmağın ol babda. Fi 30 Mart sene 308.
