Showing 1764 results

Rüsûm-ı mezkûrenin mevki’-i müzâyedeye tarh edilerek iktizâ eden teşvîkât ve tergîbât-ı müessire icrâ olunmuş ise de takarrür eden bedel üzere zamm edecek kimesinenin rağbeti zühûr etmemiş ve bunun esbâbı her senede züvvâr ile vurûdu mu’tâd olan hayvanattan geçen sene ile bu senede bir şey vurûd etmemesinden ileri geldiği led-el-tahkîk tebeyyün etmiş ve rüsûm-ı mezkûre iltizâma verilmeyip emaneten idaresi halinde vâridâtı zây’i olacağı tebeyyün eylediğinden tezekkür buyrularak ne vechile muamele olunması müktezi olduğunun beyânı zımmında meclis-i idare-i livâya havâle buyrulması babında. Fi 5 Mart sene 308.

Eriha’da zuhûr eden çekirgenin tekessür etmezden evvel mahv ve itlâfı zımmında iktizâ eden vesâile teşebbüs edilerek gaz ile itlâf olabileceği led-el-tücrübe tebeyyün etmiş ve şimdiye kadar meclis-i acizânemizden elli sandık kadar i’tâ olunmuş ise de küllî miktarda ihtiyâc olacağı cihetle kâffesi meclis-i acizânemizden i’tâsı mümkün olmayacağından ahalisi çekirge îtlâfına gitmeyen kurâ ahâlisinden birer mikdar gaz sandığı tevzî’i hususuna müsaade-i aliye-i velîy-ül-nî’metleri derkâr buyrulmak bâbında. Fi 7 Mart 308.

Mezkûr şosenin ta’mir ve ıslâhı altmış bin guruşa muhtâç olduğu bâlâda muharrer Nafıa Mühendisliği derkenârından anlaşılmış ve Kudüs kazası haricindeki umûm yollara sarf olunmak üzere 1308 senesi büdçesinden yalnız elli bin gurûş tahsîs ve tertîb kılınıp meblağ-ı mezbûrun tamamen mezkûr şosenin ta’mir ve ıslâhına sarfı veyahud bu senede nısfının ta’miriyle iktifâ olunması ve bakî kalacak meblağın diğer yolların ta’mirine sarf ve tesviye olunması tekessürü zımmında meclis-i idâre-i livâya havâle buyrulması babında. Fi 7 Mart sene 308.

Matlub-ı ta’miratın masârifi meydân-ı münâkasaya tarh edilerek merbûten takdim kılınan keşf varakası mûcibince tahmîn kılınan mesârifatın hadd-i isabette bulunduğu cihetle tenkıs edecek kimesinenin rağbeti zuhûr etmemesi ve emâneten icrâsı halinde daha evlâ olacağı tebeyyün eylediğinden berây-ı tezekkür meclis-i idâre-i livâya havâle buyrulması babında. Fi 9 Mart sene 308.

Mezkûr ___ madeninden burada idare tarafından müzâyedeye tarh olunduğu iş bu takarrürden anlaşılmış olmağla ol babda. Fi 17 Mart 308.

Hariciye Nezâret-i celîlesinin fi 21 teşrin-i sâni sene 1308 ve fi 14 kanûn-ı sâni tarihli telgrafnâmeleri mündericâtına nazaran mezkûr hanenin inşâsından bir mahzûr bulunmadığından keyfiyetin ol vechile cevaben konsolatoya iş’arı bâbında fermân. Fi 19 Mart sene 308.

Ramla yolunda vâki şosede ka’in büyük köprünün şiddetle hütûl eden baran sebebiyle hedm olduğu led’el-keşf tebeyyün etmiş ve ta’mir olunduğu halde mûrür ü ubûru münkatı’ olacağından keşfiyle iktizâ eden mesârifatın tahmin ve beyânı zımmında Nafıa sermühendisliğine havâle buyrulması babında. Fi 24 Mart sene 308.

Ba’demâ icâbına bakılmak üzere karye-i mezkûr müdüriyetinin bu babdaki mütalaasının beyânı zımmında keyfiyet oraya irade ve iş’ârı bâbında. Fi 24 Mart sene 308.

Sahib-i istidânın mukaddemâ bu babda takdîm kılınan arzuhal üzerine iktizâ eden muamele icrâ edilerek takdîm kılınmış olmağla bunun dahi vergi dairesine havale buyrulması babında. Fi 25 Mart 308.

Geçen sene icrâ olunan karantina varidât ve mesârifatını tastîr ve iktizâ eden defâtirinin tanzîm ve takdîmi zımmında Jaffa karantina varidat ve mesârifatının mikdarını mübeyyen tafsilen ve büdçe-ül-müfredât bir defter tanzîmiyle vâridât-ı mezkûreden bâki kalan akçenin ser’i-i irsâli husûsunda kazay-ı mezkûre kaymakamlığına ba-emirnâme-i irâde ve iş’ârı babında. Fi 25 Mart sene 308.