Husûs-ı mezkûr hakkında meclis-i acizânemizce led-et-tezekkür fi’l-vâki’ Kudüs’ten Beytüllahm’e kadar işleyen Kudüs arabaları üzerine Beytüllahm’de belediye meclisi tarafından yalnız birer guruş alınmakta olduğu cihetiyle Beyt-ül-lahm’dan Kudüs’e gelib re’sen (doğrudan doğruya) kâzâ-yı mezkûreye avdet eden Beytüllahm arabaları üzerine Kudüs’te yalnız birer ve Beytüllahm’de üç guruş ve buraya gelip de Bab el-Halil’i tecâvüz ve Kudüs dâhil ve haric şevâriinde işleyen arabalardan dörder guruş alınmak muvâfık-ı maslahât ve adalet olacağı mütalaa kılınmış ve melfûf olan bütçenin mündericâtı led-et-tedkîk nizâmına muvâfık görülmüş olduğundan tezekkürü zımmında meclis-i idâre-i livâya emr-ü havâlesi babında. Fi 12 Kanûn-ı sâni sene 314.
İş bu takrir meclis-i acizânemizce serâpâ mütalaa kılındı dâhil-i belde ebniyesinin Ebniye Nizamnâmesi ahkâmına tabi olmaması için karar mevcûd olmayıp derûn-ı beldede mevcûd ebniyenin birbirine muttasıl ve üç dört kattan ibâret bulunmasından naşi yeniden sokak güşâdı veya mevcûdunun tevsi’i veyahûd istikâmete tatbiki için mevcûd ebniyenin hedm ve arâzi alınmasına belediye meclisi tarafından bu seneye kadar teşebbüsâtta bulunulmadığından bi-t-tabi zikr olunan Ebniye nizamnâmesinin mevâd-ı ahkâmı icrâ olunamamış ve Ebniye Nizamnâmesinin sekizinci maddesinde vüs’ât için yola alınacak yerlerin yolun iki tarafından ebniye inşâ ve tahdidinde alınacağı mezkûr bulunmuş olmasıyla her ne kadar Ermeni Manstırınaa aid mevzû’-i bahs olan mahalattan yola icâr eden mikdarın terki talep olunmuş ise de iş bu ebniyenin geri çekilmesinden fi’-l hakika önünde köşe teşkil edip yola faidesi görülmeyeceğinden inşâsına tasavurla ruhsât i’tâsı müktezi ise o suretin emr ve irâde buyrulması mutevakkıf-ı müsaade-i celile-i mutasarrıflarıdır ol babda. Fi 18 Kanûn-ı sâni sene 314.
Meclis-i acizânemiz hastanesindeki ilacât için iki yüz altı frank seksen beş santim kıymetle Paris’ten ihdâ (hediye etme) kılınmış olduğundan eşyâ-yı mezkûre bilâ-resm imrârı husûsunun Jaffa Rüsûmat Müdüriyeti’ne ba-emirnâme-i âlîyeleri irâde ve işârı babında. Fi 1 Teşrin-i evvel sene 314.
Mezkûr arâzide terâkim eden etribe ve enkâzın tesviyesiyle muhafaza duvarı imâli geçer akçe olarak beş bin beş yüz guruş masârifâta muhtaç olduğu bâlâda muharrer mühendis şerhinden anlaşılmış ve harem-i şerif civârındaki çeşmelerin ta’mirine mübâşeret kılındığı halde keşfi icrâ kılınacağı arz olunur ol babda. Fi 28 Eylül sene 314.
Sahib-i istidânın tei-i san’attan meclis-i acizânemizce bir mahzûr bulunmadığından otuz gün için bir ruhsat i’tâsı takarrar etmiş olmağla ol babda. Fi 28 Eylül sene 314.
Dahil ve hâric-i şehirde tezyinât ve turuk için ta’liki takarrür eden iki bin dokuz yüz fanus ile altı yüz yetmiş sekiz aded sancak ta’likiyle mezkûr sancaklardan iki bin beş yüz aded küçük ve büyük dört yüz aded yedi gece tenvîri ve mum vâz’ı eşyây-ı mezkûre gece gündüz harâseti için matviyyen takdîm kılınan taahhüd senedi mûcibince geçer akçe hesâbıyla sekiz yüz guruş bedel ve Corci Cevheriye (?) Effendi ile mukâvele akd olunmuş ve meblağ-ı mezkûrdan üç bin guruş peşin ve üç bin guruş haşmetlü Almanya İmparatoru huzûrundan üç gün sonra ve iki bin guruş zehâblarından sonra i’tâ olunması meşrût bulunmuş olduğunda ifâ-yı müktezâsı zımmında muhâsebe-i livâya emr ü havâlesi babında.
Halil kapısından demiryolu mevkîfine kadar mümted bulunan ve Nafıa tarafından ta’mir olunagelmekte olan şosenin harâbiyetine nazaran muhtâc-ı ta’mir ve ıslah olduğu fi 22 Şubat sene 1315 tarihinde Meclis-i âcizânemizden mütekadim takrîrde arz ve beyân olunmuştu mezkûr şosenin şimdiye kadar ta’miri icrâ olunmadığı cihetle harabı tekessür edib ondan i eden şiddet-i agbâr mürûr ve ubûr edenlere mûcib-i meşakkât olduktan başka hulûlü takarrüb eden eyyâm-ı şitada oradan mürûr bütün bütüne münkat’olacağından ifâ-yı müktezâsı zımmında Nafıa Komisyonu’na emr-i havâlesi bâbında fermân. Fi 28 Eylül 316.
Dâhiliye Nezâret-i celîlesinden fi 2 Nisan sene 1316 tarihli mevrûd telgrafnâme üzerine Üç yüz on beş senesi Kanûn-ı evveli ibtidâsından Şubatı nihâyetine kadar üç maha mahsûben aşı me’muruyla belediye tabibi tarafından tanzîm ve it’â olunan cedvel meclis-i idare-i livâdan tasdiki zımmında fi 21 Mart sene 1316 tarihli meclis-i acizânemiz takrîriyle kuyuda led-el-müracaa tebeyyün ettiğinden cedvel-i mezkûre sür’ât-i tasdikiyle merciine takdimi zımmında meclis-i mezkûra emr ü havâlesi babında fermân. Fi 4 Nisan sene 316.
Silvân karyesi umûm ahâlisinin mürûr ve ûburuna min-el-kadim muadd iken karye-i mezkûre civârında Rum manastırına aid mahâlde sakin bulunan Kulucu (?) nam papaz tarafından tahrîb bulunduğu iş bu istidâda beyân kılınan yolun keşfi icrâ ettirildikte fi’l-hakikâ mezkûr yolun kadimden beru mevcûd ve umûma aid idüğü ve bu kere mumâ-ileyh papaz tarafından seddine mübâşeret olunduğu balâda muharrer keşif me’murlarının şerhinden anlaşıldığından ve turûk-ı umûmînin muhâfazası muktezâ-yı nizâmdan idüğünden mezkûr yolun behemahal güşâdıyla hey’et-i kadîmesine ircâsı lüzûmunun tenbîhi zımmında Rum Patrikliği’ne bir tezkere-i âliyelerinin şeref-tastîri bâbında ferman. Fi 19 Nisan sene 316.
