Εμφανίζει 10788 αποτελέσματα

Mercimek, 1 şinik = 6 guruş
Mercimeğin beher şiniki sağ olarak altı guruş fi’yât ile furûht olunmakta olduğu led-et-tahik tebeyyün etmiş olmağla ol babda. Fi 28 Teşrîn-i sâni sene 314.

Ba’de icâbına bakılmak üzere evvel emirde ruhs-ı mezkûre i’tâsından bir be’is ve mahzûr mevcûd olup olmadığının bi-t-tahkik ve mahzûr olmadığı tebeyyün ettiği halde üzerine kefâlet senedi ahzı zımmında Polis dairesine ve zabıtaya emr ü havâlesi babında. Fi 10 Kanun-ı evvel sene 314.

Merkûmun âdem-i iktidârı meclisce tahakkuk ettiğinden belediye nizamnamesinin altmış altıncı cezâ kanûnnâme-i hümâyunun otuz yedinci maddesine tevfiken bir hafta tevkifi tensib kılınmış olmağla ifâ-yı müktezâsı zımmında tekrar zabıtaya emr ü havâlesi babında. Fi 14 Kanun-ı evvel sene 314.

Hâric-i şehirde fanus ta’likiyle tekyin (süsleme) ve tanzîf icrâsı ve bekçiler ta’yini taht-el-zimmette bulunarak hâric-i şehir sekenesinin ekserîsi ecnebî bulunmasıyla hususât-ı mezkûreye iktizâ eden masârifâtın cihet-i tesviyesi tezekkürü zımmında konsolâtoların tercümanları taleb olunarak husûs-ı mezkûru led-et-tezekkür bunun balâda muharrer olduğu vechîle sağ akçe olarak iki yüz bin guruş müktezi olacağı tebeyyün etmiştir icraât-ı mezkûre tedricen mevkî’-i fiile koyulmak üzre bekçilerin ta’yini başka seneye ta’liki ve üç yüz on beş senesi ibtidâsından tekyini ve tenvir ile iktifâ olunması iş bu tekyin ve tenvîr için müktezî yüz bin küsûr piastersun hâric-i şehirdeki emlâk erbâbı üzerine tevzî’i mumâ-ileyhim tercümanlar tarafından beyân olunmakta olub iş bu icraat menâfi’i aidiyeti hesâbıyla dâhil-i şehirde ve diğer memleketlerde sekene üzerine mevzû’ bulunmuş olduğundan bunun dahi sükkân üzerine tahsîsi meclis-i acizânemizce mütalaa olunmuş ise de mezkûr bekçiler ta’yininden sarf-ı nazar olunub olunmamasından ve mesârifâtının sûret-i tevzî’i ba-tezekkür beyânı zımmında meclis-i idâre-i livâya emr ü havâlesi babında. Fi 19 Kanûn-ı evvel sene 314.

Ramazan-ı şerifte Jaffa kazasında endaht olunmak üzere yüz otuz kilo barut müktezi olduğu ve Jaffa askeriye depoyundan mübayaası talep olunmuş ise de mevcûd olmadığı Jaffa belediye riyâseti vekâletinden mevrûd tahrirta beyân olunmuş olduğundan matlûb barutun fiy’ât-ı mütekarrire ile bura depoyundan furûhtu husûsunun Kudüs Mevki’ Kumandanlığı cânib-i vâlâsına ba-tezkere-i-i âliyeleri irâde ve iş’ârı babında. Fi 21 Kanûn-ı evvel sene 314.

Arâzi-i mezkûrenin keşfi icrâ ettirilerek makbere ittihâzında bir mahzûr olmadığı ve cemaat-i mezkûrenin şöhretli Amerikan cemiyeti olduğu bâlâda muharrer şerhden anlaşılmış olmağla ol babda. Fi 23 Kanûn-ı evvel sene 314.

Şehit evlatları için toplanan iane hakkında
Tahrirât kaleminden ihrâc kılınan pusulada muharrer tahriratlarda beyân kılınan iânât-ı ayniyyenin defâtiri vaktiyle leff edilerek Dersaadet’te komisyon riyâsetine irsâl olunmak üzere makâm-ı âlî-i mutasarıffiyet-i efhemiye takdîm kılınmış ve iâne-i nakdiye yedi bin guruşdan ibâret olub defâtirinin sûreti bi’l-ihrac matviyyen takdim kılınmış olmağla ol babda. Fi 24 Kanûn-ı evvel sene 314.

Mezkûr suyun ücret-i nakliyesi münâkasaya tarh edilerek beher tulum ücreti sağ akçe hesâbıyla beş para bedel Veysi Hasan kefâletiyle Abdülmuhsin bin Halid uhdesinde takarrür etmiş olmağla münâsib bulunduğu takdirde tasdiki zımmında meclis-i idâre-i livâya emr ü havâlesi babında. Fi 28 Kanûn-ı evvel sene 314.

Kasapların arzuhali üzerine
İş bu istidâ led-el-mütalaa Mûsevi diyânetince tariz (?) denilen lühûm (etler) ile ağnamın bacakları lahmi (et) ekli câiz olmadığı sebebiyle ekli câiz olup olmayacak lühûmun tefriki için ve ___ olup mûsevi diyânetince ekli câiz olacak lühûmun daha ziyâde paha ile furûht olunduğu cihetle Müslümanlar tarafından mûsevi kasaplara zebh ettirilmekte olduğu ve mûsevi kasap tarafından zebh olunup kendilerince ekli gayr-i câiz olan ve müslimine furûht olunan ağnam hin-i zebhinde Allah ü Ekber ayet-i celâlesi zikr olunduğu temini için me’mur-ı mezkûr ta’yin olunduğu anlaşılmış ve meclis-i belediye tarafından bu husûsta bir muâmele sebkat etmediği ve meclis-i idare-i livâca olmuş olacağı melhûz bulunmuş olduğundan tezekkürü zımmında meclis-i mezkûra emr ü havâlesi babında. Fi 2 Kanûn-ı sâni sene 314.

Husûs-ı mezkûr hakkında meclis-i acizânemizce led-et-tezekkür fi’l-vâki’ Kudüs’ten Beytüllahm’e kadar işleyen Kudüs arabaları üzerine Beytüllahm’de belediye meclisi tarafından yalnız birer guruş alınmakta olduğu cihetiyle Beyt-ül-lahm’dan Kudüs’e gelib re’sen (doğrudan doğruya) kâzâ-yı mezkûreye avdet eden Beytüllahm arabaları üzerine Kudüs’te yalnız birer ve Beytüllahm’de üç guruş ve buraya gelip de Bab el-Halil’i tecâvüz ve Kudüs dâhil ve haric şevâriinde işleyen arabalardan dörder guruş alınmak muvâfık-ı maslahât ve adalet olacağı mütalaa kılınmış ve melfûf olan bütçenin mündericâtı led-et-tedkîk nizâmına muvâfık görülmüş olduğundan tezekkürü zımmında meclis-i idâre-i livâya emr-ü havâlesi babında. Fi 12 Kanûn-ı sâni sene 314.