Showing 10788 results

Bu babda mukaddemâ takdîm kılınan tekârirde Bâb el-Amûd karakolhânesi ta’mirâtı için bir şey zikr olunmadığı ve hapishâne karakolhânesi vaktiyle keşfi icrâ edilerek tanzîm kılınan keşf defteri fi 20 Mart sene 1308 tarihli meclis-i âcizânemizden verilen derkenâr üzerine meclis-i idâre-i livâya havâle buyrulmuş olmağla ol bâbda. Fi 5 Mayıs sene 308.

Sâhib-i istidânın tesvîyesi talebinde bulunduğu masârifâtın ba-tahkîk sıhhati tebeyyün eylediği halde hangi turukdan sarf ve tesvîyesi müktezi olduğu beyânı zımmında meclis-i idâre-i livâya havâle buyrulması bâbında. Fi 7 Mayıs sene 308.

Matlûb ta’mirâtın masrafı meydan-ı münâkasaya tarh olunarak teşvîkât ve tergibât-ı aleniyye-i müessire icrâ olunduktan ve tâlib bulunanlar keff-i yed (el çekme) eyledikten sonra merbûten takdîm kılınan keşf ve münâkasa varakası mûcibince geçer akçe olarak bin iki yüz guruş bedel ile Seyyid Muhammed Semz (?) kefâletiyle Derviş El-Said Muhammed uhdesine takarrür etmiş olmağla ol bâbda. Fi 9 Mayıs sene 308.

Fi’l-hakika mezkûr ta’mirin hey’et-i hâzırası vechile kaldığı halde mürûr u ubûra hâ’il olacağı gibi redâvet-i havaya mûcib bulunmuş olduğundan ta’mirine baktırılmasına rûy-ı rızâ göstermeyen Hasan Bin Halil ile Mahmud El Şeref ve Hacı Bekir Effendi El Davudi celb edilerek imâline cebr edilmesi zımmında zabıtaya havale buyrulması babında. Fi 11 Mayıs sene 308.

Mezkûr ta’mirâtın tekrar meydan-ı münâkasaya tarh edilerek bâlada mıstar derkenarda arz olunduğu vechile tahmin kılınan masarifâtın had-i nısfâniyetinde bulunduğu cihetle tenkîs edecek kimesinenin rağbeti zuhûr etmemiş olmağla ol babda. Fi 11 Mayıs sene 308.

Turuk fazlasından olup bir kısmında kıraathâne inşâ olunan arsadan bâki kalan mahalde dört bab dükkan ile dört oda inşâsı için mukâvele akdi hakkında fi 7 Zilhicce sene 1308 tarihli sahib-i istidâdan bâ-arzuhâl istidâ olunması üzerine mahal-i mezbûrun keşfi icrâ olunarak imâli taleb olunan mezkûr ebniyenin aliyyül-akall seksen bin guruş masârifâta muhtaç olduğu tebeyyün etmiş ve meclis-i âcizânemiz sandığında akçe mevcûd bulunmamasından ve mahal-i mezkûrun inşâsından menfa’ât ve vefret-i mesârifâtına nazaran faide-i külliyesi bulunmasından dolayı on iki senede intifâ’ edilmek ve her senede tarafından belediye sandığına on aded lirây-ı Fransız i’ta etmek ve mezkûr on iki seneden sonra meclise terk etmek üzere mahallât-ı mezkûrenin matviyyen takdîm kılınan harita mûcibince inşâsına ittifâk hâsıl olarak bu babda müttehiz olan belediye nizamnâmesinin 39. ve 42. maddelerine tevfiken iktizâ eden mukâveleyi bi’l-akd bir kıt’a taahhüd senedi ahz ü hıfz olunmuş ve tarafından ebniye-i mezkûre ameliyâtına mübâşeret oldukta arsay-ı mezkûre orada mücâvir bulunan Ofimyâ(?) nam râhibe arâzisinden terk ve ona aid olduğu bidâyet mahkemesinde iddiâ edilerek nizamnâme-i mahsûsa tevfiken ebniye-i mezkûre ameliyâtı on beş gün tevkîfine hâcet mess etmiş ve merkûmenin hakkı olmayıp tevsî’-i târikden kalıp bir kısmında kıraathâne inşâ olunan mahal idüğü tebeyyün etmesiyle ebniye-i mezkûre ikmâline rushsat verilmiş ve şimdiye kadar te’hiri ile teâti kılınan kontratoda meşrût Sedât Alemiye’ye aid hamamın mecrâsına tavassut etmek için mahal-i mezbûra bir kapu küşadından temettu’ etmesinden dolayı ileri gelmiş olduğundan işbu protesto şimdiden reddiyle sâhib-i istidânın bir diyeceği var ise iktizâ eden mahale müracaât eylemesi müktezî olduğu meclis-i âcizânemizce tebeyyün etmiş ise de ol bâbda emr ü fermân hazret-i menleh-ül-emrindir. Fi 12 Mayıs sene 308.

Mezkûr kayığın varidâtı nehr-i mezkûrun ta’mirine sarf olunmak üzere vaktiyle meclis-i acizânemiz sandığına tevrîd eden ve muahharan muhasebe-i livâdan hâsıl olan talep üzerine alınan mebâliğ asıl masraftan mahsûb edilerek muhâsebe-i livâca sahib-i istidâ zimmetinden varidât kaydı icrâ olunmuş ve işbu arzuhal-i diğer mündericâtı meclis-i acizânemize aid mevaddan bulunmamış olmağla ol babda. Fi 12 Mayıs sene 308.

Değirmen vapurları üç yüz yedi senesi kânun-ı evvel ibtidâsından üç mah müddetten sonra taş kömürüyle idâre olunması 25 Teşrîn-i sâni sene 1307 tarihli meclis-i idâre-i livâdan bâ-ilâm beyân olunması üzerine keyfiyet mezkûr değirmen vapurları erbâbına tebliğ olunarak devlet-i ecnebiye teba’sından olan eşhâsa dahi tenbîh olunmak metbû’ oldukları devlet konsolatosuna makam-ı âlî-i mutasarrıfiyyeden bâ-tezkere-i mahsûsa beyân olunmuş ve oldukdan beri beş mah mürûr edip hâsıl olan tahrirattan müstebân olduğuna nazaran mezkûr değirmenler şimdiye kadar hatab ile idâre olunmakta bulunduğu tebeyyün eylediğinden ber mûcib-i ilâm-ı mezkûr meclis-i âcizânemizden ta’yin olunacak âzâ huzûruyla iktizâ eden teftişâtın icrâsıyla böyle mevcûd olan hatab bi’l-vezn mikdarına nisbeten ihrâkına bir müddet tayini ve akabinde bir şey bulunduğu takdirde zabt ve müsâdere olunarak madde-i mezbûre nazar-ı dikkat ve itinâya alınması zımmında zâbıtaya havâle buyrulması bâbında.

Tarik-i mezkûr min-el-kadim mevcûd olub bilâ-vecibe meşrû’ me’mur tarafından sedd edilerek arazilerine ilhâk olunduğu bâlâda muharrer keşiften anlaşılmış olduğundan meclis-i acizânemiz mühendisi mevcûd iken fethiyle he’yet-i kadimesine iâdesi müktezi olduğunun Beytüllahim kazası müdüriyetine ba-emirnâme-i âliyeleri irâde ve iş’arı babında. Fi 13 Mayıs sene 308.